ചാതിപ്പ്

ചാതിപ്പ് (CHAATHIPP) കേരളത്തിലെ ആദിവാസി വിഭാഗമായ മലവേടരുടെ മാതൃഭാഷ ആണ് ചാതിപ്പ്. മലവേടർക്കിടയിൽ ചാതിപ്പാണി എന്നും ഇതിനെ വിളിക്കുന്നു. പാണി എന്നാൽ ഭാഷ എന്നാണ് അർഥം. മലയാളം, തമിഴ് സമ്മിശ്രമായ ഭാഷയാണ് ഇതെങ്കിലും കൂടുതൽ സാമ്യം തമിഴിനോട് ആണ്. കോട്ടയം, പത്തനംതിട്ട, ഇടുക്കി ജില്ലകളിൽ ആണ് ഈ സമുദായം കൂടുതലായി അധിവസിക്കുന്നത്. മലയാള ഭാഷയുടെ സ്വാധീനം മൂലം ഈ ഗോത്ര ഭാഷയുടെ പങ്ക് കുറയുകയും മലയാളത്തിലേയ്ക്ക് ആളുകളുടെ ആശയമിനിമയം മാറുകയും ചെയ്തു. തത്ഫലമായി മലവേടരുടെ ഒന്നാം ഭാഷയായി മലയാളം മാറുകയും ചെയ്തു. മാത്രമല്ല പുതുതലമുറ ഭാഷയോട് കാണിക്കുന്ന നിസഹകരണവും ഇതിന് ഒരു കാരണമായി.ലിപി ഇല്ലാതെ വായ്മൊഴിയായി നിലനിന്നിരുന്ന ഭാഷ ഇപ്പോൾ അതിജീവന പ്രതിസന്ധിയും നേരിടുന്നു. ചാതിപ്പ് ഇപ്പോൾ പ്രായമായവർ ഉപയോഗിക്കുന്ന ഭാഷ എന്ന നിലയിൽ മാറിയിട്ടുണ്ട്. ഭാഷയുടെ പ്രാധാന്യം അറിയാത്ത ഒരു തലമുറ അതിനെ പ്രോത്സാഹിപ്പിക്കുന്നതും ഇല്ല. എരുത്വാപ്പുഴ, അടിച്ചിപുഴ, ചൊളനാവയൽ, കാക്കമല പോലുള്ള മലവേടർ ഗോത്ര വിഭാഗം തിങ്ങിപാർക്കുന്ന ഇടങ്ങളിലേയ്ക്ക് ഭാഷ ചുരുങ്ങി.ഭാഷ എന്നാൽ ഒരു സംസ്കാരം എന്ന് തിരിച്ചറിഞ് ചാതിപ്പിനെ നിലനിർതാനുള്ള ശ്രമങ്ങൾ ഉണ്ടാകണം.